Migl a Joon don deh ya, ahn chrapikal staam oanli lov ton ihself intu harikayn! Wi don si how Agata, di fos staam pahn di Pasifik said, mi geh faysi ahn kraas oava Senchral Amerika, intu di Kyaribeeyan ahn hit Kyooba. Bileez mi geh sohn rayni rayni weda eena paat a Bileez wen Agata mi-di krass oava. Bowt chree aatikl abak, wi mi shyaa wid unu di nayhn dehn a di harikayn lis fi di 2022 Atlantik Harikayn Seezn. Tudeh, wi waahn karek chree Kriol spelin mistayk wi mi mek:
English | | di karek Kriol spelin |
Alex | | Aleks |
Wi mi mek mistayk ahn spel di Kriol sayhn way laik di Inglish. Bot Kriol spelin sistim noh ga no "x" leta. Instead, wi yooz "ks" fi rait disya song a di Inglish "x." Sohn egzampl da: beks (angry), teks (text), neks (next). Pahn tap, memba seh dat di Kriol spelin sistim bays pahn song. Soh, sohntaihn di Inglish "x" mek wahn neks song eena di Kriol way, laik wahn 'haad g' song wid wahn 'z" song di fala. Di Inglish wod dehn "exact" ahn "example" eena Kriol da: egzak, egzampl.
English | | di karek Kriol spelin |
Gaston | | Gyaston |
Eena Kriol, lat a taihn wi glaid di 'haad g' ahn 'haad c' (=k) song intu wahn 'gy' er 'ky': gyaadna (gardener), gyal (girl), Kyaribeeyan (Caribbean), kyat (cat)
English | | di karek Kriol spelin |
Virginie | | Verjini |
Kriol spelin sistim yooz "j" fi di Inglish "saaf j" song, "saaf g" song, ahn laik fi di Inglish "dr"song. Oanli di 'haad g' song yooz "g" eena Kriol spelin: grayta (grate/grater), bot jenklman (gentleman), jenaral (general); jekit (jacket), jrayn (drain), jrai (dry). Plos eena Verjini, wi now fiks di 'shaat e' song.