Leela Eena Wi Memri

Wi ku haadli bileev seh dat wan yaa don paas sins wi Brokdong Kween, Leela Vernon gaahn lang. Wi hoap seh dat Leela deh rait deh eena Hevn, langsaid Mista Peetaz, ahn Andy Palacio, ahn Paul Nabor , ahn Jaaj Gabb (George Gabb), ahn Julian Cho, ahn soh moch moa peepl hoo help mek wi Bileezhan aidentiti. Da laas yaa Maach 2, 2017, wen Bileez mi beri Leela Vernon wid tap aanaz. Shee mi paas aan Febiweri 19, 2017. Now, dis yaa Febiweri 24, 2018, Leela mi wahn soh prowd a sohn a wi Bileezhan styoodent weh di stodi eena Taiwan. Maybi sohn a unu mi si di toari The Reporter mi du laas week bowt di Bileez Embasi ahn styoodent dehn weh mi deh da di sekan Latn Amerikan ahn Kyaribeeyan Festival da di Taipei Expo paak. Fu di Bileez kolcha daans, 3 styoodent eena Taiwan mi put aan wahn gud gud display! Dehn du wahn pulaali daans a Kriol, Garifuna ahn Maya-Mestizo myoozik! Da di styoodent Alex Orellano hoo put it tugeda, ahn Damita Meighan ahn Leandra Flowers daans it wid hihn!

 

Leela Eena Wi Memri
(L) Leandra Flowers (R) Damita Meighan, 2 a di Bileezhan styoodent dehn da Ming Chuan Yooniversiti eena Taiwan. Wi tank di Bileez Embasi eena Taiwan fu help owt wid di owtfit dehn!

 

Leela Vernon mi wahn lov op dehnya daans eena Kriol jres... Hapi Maach 9, Bileez!



Brought to you by the:



Kriol is the language spoken by many Belizeans, especially the Creole people of Belize. Although it is often perceived as a dialect of English, it is indeed it's own language with grammar and spelling rules. The National Kriol Council of Belize was created to promote the culture and language of the Kriol people of Belize, as well as harmony among all the ethnic groups of Belize. Please visit the website of the National Kriol Council of Belize for lots of good information about the Kriol language and the Creole people.


The Kriol Council has been kind enough to send us the weekly "Weh Wi Ga Fi Seh" column that is usually published in the Reporter.


Check back weekly for new articles.


Latest Posts