Dis da moa fahn wahn shaat toari nayhn "Benksaid Bembeh" weh mee, Silvaana Udz, di rait. Too bombali, Klotilda ahn Raydyens, baas op di benksaid, bot da Klotilda da-mi di reel benksaid bembeh! Raydyens, ih baldoosh, kaal ahn Kloti. Wi mi kaal di fos lee pees a di toari wi mi shyaa "Oal-taihn Washin." Wi pik op di toari tudeh wen Kloti pul op langsaid Raydyens hoo mi-di wash pahn ih skrob boad.
Raydyens mi-di tek ih taihn, di ring owt di waata fahn wahn big blofoto pants weh mi bilangz tu ih big son. Ih mi-di ring owt az moch waata az ih tin lee han dehn kuda du. Wat a pyaa dehn mek! Soh Klotilda big ahn bregin, da rait soh Raydyens smaal ahn kakataari. In fak, da-mi fahn wahn lang lang taim abak, wen di too a dehn da-mi lee gyal ahn dehn doz waak tugeda, priti no pus bak fut, eena dehn dandan goh choch evri Sondeh maanin—fahn den dehn da-mi aysdoos.
Bot az dehn groa op, soh Tilda geh biga ahn biga, soh Raydyens lee badi stay smaal ahn waiyari... Ahn mataz bee dat Raydyens badi mi soh smaal. Noh mek ih lee saiz fool yu. No-taal! Az yu maita don figa owt seh, eevn if Ah neva don tel yu bifoa, soh Klotilda lowd ahn halari, soh Raydyens smaal bot kakataari. Wan ting di hoal vilij mi noa, doh, da dis: Owt a di too a dehn, da Klotilda mowt rool. Klotilda win di Benksaid Bembeh taikl evritaihn, enitaihn.
[Wi wahn shyaa moa fahn disya toari eena ada Kriol aatikl "Weh Wi Ga Fi Seh" fahn taim tu taim.]